قصــة ليلــى والذئــب .. بنكهه عدنيه ..

الســـلام عليكم ورحـــمة الله وبركـــاته

طبــعا الكـل يعرف قصــة .. ليــلى والذئـب

ولــكن هنا تختلف القصة ..
أقدم لكم ليلى والذئب >> النســخه العــدنيه

اكيــد العدنيـين هما اللي بيفهــموها
واللي مايفــهم >>بسيطه يشتري قاموس للهجات


نبـــدأ ...

ام ليــلى تصيح لبنتها وهي تلعب ::
ياليلــــى بنت ياليلى يا أم الجن فينـــك

ليــلى: أني هنــا يامــه ايش تشتي
الام: لك حـبه برأسك فين كنتي
اني شحبتوا من كثر ماصيحت لك
ليلــى: كنت العـب شبــدلو

الام: طيب يامـليحه روحي بيت الجيران
وقولي لهم لو في معاهم سـكر لأني
بسوي كعـك لجدتك وخلص السـكر

ليـلى: طيب يامـه

ليلى راحت لبيت الجـيران ودقت الباب
بعنف ثوري ,,
صاحت خالة (فطـوم) جارتهم:
لك كسـر بيدك ياللي تدق الباب ..
إيش تشتي تكـسره

ولما شافت ليـلى قالت لها:
ليش كده تدقي الباب
إيش فيبك جــني

ليـلى: اصلا اني مستعجله ياخالة
مطـت خالة (فطـوم) شفايفها وهي
تقول (إللي يسمعها يقول معاها
الوزارة) وقالـت: إيش تشتي طيب

نعم .. تقول أمي .. نعم .. في معاكم ..
نعم ..قليل .. نعم
الخالة (فطــوم) : لك لعصه تلعصك ..
إيش من نعم تشتيهو مني دحـينه ؟؟

ليـلى: لا لا ياخالة ,, نعم تقول أمي
معاكم قليل سكــر ؟؟

طيب أصبـري بجيب السـكر
وراحت فطـوم المطبخ وهي تتمــتم
(ياربي متى بنسكه من دولا الجيران
اللي ولا يبطلو شحاته .. كملوا الراشن)
واحضرت السكـر

وعلى طول ليـلى جرت بالسكـر
لعند امهـا
وبعد مشاوير لكل بيت في العماره
عشان طلبات الكعـك (دقيق _ سكر _
زبده _ صحن حق الكعك _ الخ الخ ..
حيث أن الوصفة تتضمن انه لزيادة
حلاوة الطبخة لازم تكون معمولة
من البلاش والبلاش زي ماتعرفوا
حــــــــــااااالـــي)

المهم ليـلى شلت البرتن (الوعـاء)
حق الكعك وراحت الغابة

وكانت ليـلى ذات الرداء الاخضر >> أقضد الاحمر
تجري وتتقفـز وتلعب في الغابة وهي
في طريقها لجـدتها

كان مشــوار الغـابة من أحلى المشاوير
المهم بعد القنفـزه والتمتع
بخيرات الطبيعة
كانت كل ماتشوف وردة تقول
اووووه ياربي محسنه تجــنن

وتقطعها وبعد قليل وعشان تبرد قلبها
ترميها بالأرض وتدعسها تمام
عشان ما يتعرف أهل الوردة
على بنتهم المغدور بها

وهكذا مع كل شجرة تكتب فيها
ذكرياتها عشان تخلدها الاجيال
القادمة ( على أفتراض انها ستصير
مثل هدى شعراوي أو شجرة الدر )

المهم وبينما هي تتقنـفز شافت
ذئـب متخبي وراء شجرة وذيله
باين من العرم حق الشجرة

على طول قفـزة لعنده وصاحت:

ايـوه .. شفتك .. أنت تشتي
تأكل جدتي

الذئـب: أعوذ بالله من الشيطان الرجيم
فجعـتينا الله يشلك .. الواحد يقول احم
ودستور مش تقفزي فوقي
زي الجــني ..

ليـلى: أني عارفه أنك الذئب الشرير
إللي يشتي يأكل جدتي ويلبس
ثيابها ولما أفتح الباب بيأكلني
أني كمـان ..

الذئــب: لك جنـي يشلك إنتي وجدتك
مين إللي يشتي يأكلك إنتي يارمه
ياخايـسه .. انا مش ناقص تسـمم

ليـلى: ياعني أنت ماتشتيش تأكل
جدتي ..
الذئــب خلاص قده يتقرف من الضبح
والقهر من العقل الطاير حق ليلى
وصـاح فيها ..

اقولك يابنت اقصري الشر وروحي
من قدامي دحين انا مش فاضيلك

ليـلى تركته في حالة ورجعت تتقنفز
وهي تغني ... انا ليلى انا من غيري انا
ههههــــ >> شكلها صايعه

وفجأة لقت الذئـب وراء شجرة ثانيه
وذيله باين من الجذع فقفزت فوقـه
قفـزه زي الكابتن ماجـد وهي تقول:

كشفتك .. أنته تلحقني ولا إيش
انت تشتي تأكل جدتي .. انا عارفة
إنك شرير ..

الذئـب: ياقلبي لك الحبحب ..
يابنت قلبي ورم منك إيش معك
والزنقلة حقك .. انا مشتيش اكل
جدتك لك بقرة تلحسك إنتي وجدتك

ليـلى: يعني مش ناوي على شر اليوم

الذئـب: تشتينا احلف بأيش عشان تصدقي
ياجنية انا عادنا أكلت قبل نص ساعة
صحــن منــدي

المهم ليـلى تركته في حاله ورجعت
تتقـنفز كالعادة .. وهذي المره جلست
تغني اغاني .. أمل كعدل وفيصل علوي
( ماقدرت أنقل ماقالته عشان بعض
الناس عندهم تحسس من هذه الاغاني)


المهم هذه المره شافت الذئـب خلف
شجره عتيده وذيله باين من الطرف ..

وهنا وبدون صبر كعادتها المجنونه
قفـزت فوقة زي الحصان حق
بيـبيرو وهي تقول:

شفتك يامفضوح .. هذه المره اوبه تقول
إنك ماتشتيش تأكل جدتي.. أني
متأكده هذي المره


الذئــب ما أستحمل .. أنفجر وبدأ ينتف
شعر جسـمه وهو يصيـح ..


يا مـــــااااااااااااااااااااااااااه
الحقــوني ...
بامووووووووووووووت .. لي ساعه
وانا أشتي أعمل حمام وراء الشجرة

ودي البنت ماخالتلي حــال ..
أشــوف فيها يـوم ..


ههههههههههههـــــــــــ استمتعوا





اتمـــنا تعجــبكم .. وماتنسوا التقــييم